XIJTEMO TOTECO



Toteco quinchijqui masehualme para ma quiixmatica.

Toteco quipiya nochi chicahualisti huan ya tatzejtzeloltic pampa amo quipiya yon se tajtacoli.

Pampa nochi timasehualme titajtacolchijtoque huan ni tajtacoli techtzacuilía para timonechcahuise campa Toteco.

Toteco tahuel techicnelía huan quisencajqui quenicatza huelis timonechcahuise campa Ya. Pampa nochi nopa tajtacoli ten techtzacuilía, Toteco quitamilti quema Jesucristo motemactili para miquis ipan cuamapeli, quej ni techilhuía ipan Colosenses 2:13,14.

Toteco quipiya hueyi iyolo huan amo quinequi yon se ma polihui nepa micta. 2 Pedro 3:9

Huelis timoilhuía ¿quenicatza nijchihuas para nimonechcahuis campa Toteco?

Yajaya mojmosta mitzchixtoc ximonechcahui para mitztapojpolhuis. Quej ni techilhuía ipan Apocalipsis 3:20 San quichixtoc xijtapo moyolo pampa quipiya nochi chicahualisti para techtapojpolhuis pampa san onca se ojti para se masehuali ajsis campa itztoc Toteco, yajaya Jesucristo. Juan.14:6.

San xijmactili moyolo huan xiquilhui:
“Toteco, nijmati para san tahuel nijchijtoc cati amo mitzpactía huan nijnequi techtapojpolhui para huelis nimitznechcahuis pampa nijmati para ta amo hueli tiquita tajtacoli.”
Huan Toteco mitzselis pampa quiijtohua ipan Juan 6:37 para: sinta tihualas campa Ya amo quema mitzcuepas.

Huajca sinta ama tijmactilijquía moyolo Toteco, xijneltoca para ayecmo quema tiitztos moselti. Mateo 28:20b.

Pampa mitztalilijtoc isello Itonal ten tatzejtzeloltic, yanopa Itonal Toteco ten nochipa mitzyoltalis pampa ya nopa itequi. 2 Corintios 1:22

Huan para titatzquitos nochipa ipan Toteco xijpohua Icamanal mojmosta, xijcamahui mojmosta para tijmatis taya quinequi xijchihua.

Pampa Amocualtacat hualas huan quinequis ximocuepa para sempa xijchihua cati tijchihuayaya. Ipan 1 Juan 2:1 quiijtohua para tijpiyaj se totatempalehuijca, yajaya Jesucristo.

Huajca ama tiicone Toteco huan monequi tinemis quej Ya pampa yaya nel tatzejtzeloltic. 1 Pedro 1:15, pampa quej se tetaj quicuahuasashuía icone quema quichihua cati amo cuali, Toteco nojquiya mitzajhuas. Pero amo mitzquixtilis cati mitzmacatoc, ya nopa eli nemilisti ten yancuic para nochipa 1 Juan 5:11-13. Nojquiya tijpiyaj tochaj nepa ilhuicac para sese ten tojuanti cati tijneltocatoque, Juan 14:2.

Huajca, ¿quenicatza tijpaquilismacase Toteco para ma techtiochihua?

Techmacatoc se tanahuatili. Ma tiquinpohuilica sequinoc quenicatza Toteco Jesucristo motemactili ipan cuamapeli para huelis ticalaquise ilhuicac.


Icamanal Toteco:


Colosenses 2:13-14

Achtohuiya anitztoyaj quej anmictoque iixpa Toteco pampa san antajtacolchijtinemiyayaj huan amo anquitemohuayayaj Toteco pampa amo anisraelitame. Pero ama quena, Toteco amechyolcuitoc ihuaya Cristo huan amechtapojpolhuijtoc nochi amotajtacolhua. Sesen ten tojuanti tijpixtoyaj quej se amat cati techtelhuiyaya ten tajtacoli tijchijtoyaj huan cati titahuicayayaj iixpa Toteco. Pero Cristo quitali nopa amat ica totajtacolhua ipan icuamapel huan nepa quitamilti nochi cati ica techtelhuiyaya. Quichijqui ya ni quema mijqui por tojuanti.


2 Pedro 3:9

Toteco amo quielcajtoc cati quiijtojtoc quej sequij moilhuíaj. Techtencahuilijtoc para sempa hualas, huan temachti hualas. Pero ama yaya quichiya pampa nelía quipiya iyolo ica tojuanti huan quinequi nochi ma timoyolpataca huan ma tijcahuaca totajtacolhua. Amo quinequi yon se ma polihui para nochipa.


Apocalipsis 3:20

“Xiquita, nimoquetza campa puerta huan nimitznotza. Sinta techtoscaquis huan techcaltapos, nicalaquis huan nitacuas mohuaya huan tielis tinohuampo.


Juan 14:6

Huan Jesús quiilhui: ―Na niojti, nitehuicas ilhuicac. Na niitztoc cati melahuac huan nitemaca nemilisti yancuic para nochipa. Amo aqui huelis ajsis campa itztoc noTata nepa ilhuicac sinta amo nechneltoca.


Juan 6:37

Nochi masehualme cati noTata quintapejpenijtoc para nechmacas, hualase campa na, huan cati hualase campa na, na amo quema niquincuepaltis.

2 Corintios 1:22

Quena, Toteco quitalijtoc imachiyo ipan tojuanti para ma nesi tiiaxcahua. Huan yaya techmacatoc Itonal ipan toyolo quej se tayacanca tomi cati technextilía para temachti techmacas nochi cati techtencahuilijtoc masque noja polihui para techmacas.


1 Juan 2:1

Noconehua cati nimechicnelía, nimechtajcuilhuía nochi ni tamanti para amo xitajtacolchihuaca. Pero sinta se acajya tajtacolchihuas, tijpiyaj se totatempalehuijca cati itztoc iixpa Toteco Totata. Totatempalehuijca yaya Jesucristo cati quichihua san cati senquisa cuali.


1 Pedro 1:15

Tatzejtzeloltic Toteco cati amechnotztoc para xiitztoca aniconehua; huajca amojuanti nojquiya xiitztoca antatzejtzeloltique huan xijchihuaca cati senquisa cuali.


1 Juan 5:11-13

Huan ya ni cati Toteco techyolmelahua: Toteco techmacatoc nemilisti cati yancuic huan ni nemilisti cati yancuic eltoc ipan Icone Jesucristo. Yaya cati quipiya Icone Toteco ipan iyolo quipiya nemilisti cati yancuic, pero cati amo quipiya Icone, amo quipiya nopa nemilisti.


Juan 14:2

Nepa ilhuicac campa ichaj noTata onca miyac calme para ipan anitztose. Sinta amo melahuac, nimechilhuijtosquía. Na niyas nepa nimechchijchihuiliti amochaj campa anitztose.




XIMOCUEPA TOCHAJ