TOJUANTI: CENTRAL

Quenicatza panotihualajqui nopa Biblia ica Nahuat

Huejcajya ipan 1945, nepa ipan Municipio Tamazunchale San Luis Potosí, itztoya se toicni itoca Juan Dale; yaya momachti náhuat, huan tequipano ipan se escuela campa quinmachtiyayaj quenicatza quimachilise tepohuilise Icamanal Toteco, ni toicni nojquiya tepaxalohuayaya ipan ranchos ica masehualme ten camanaltiyayaj náhuat huan quinpohuiliyaya Icamanal ica nahuat, huajca para quinejqui mas ma quimachilica Icamanal Toteco, yaya quinahuapatac nopa Evangelio San Juan, huan quichijqui se pilamochtzi para masehualme ipan ranchos, pero amo quipixqui tonali para quipatas más Itlajtol Toteco.

Ipan 1970 sequinoc toicnihua, ten initoca Ricardo huan Patricia Beller, pejque momachtíaj náhuat ipan se rancho itoca Cuatenahuatl ipan Municipio tlen Huautla, Hidalgo; pampa Toteco quinnotztoya para quitequipanose huan quinahuapatase Icamanal para masehualme nica huan quichihuase se diccionario. Nepa ipan Cuatenahuatl quinpalehuijque masehualme ica pajti, huan quichijque se curso para sequinoc nojquiya ma huelise camanaltise ica náhuat. Teipa pejque quipataj Icamanal Toteco ica náhuat. Quema ya tequipanojtoyaj se ome xihuit, quipantijque para onca eyi tamanti náhuat catli mopata ipan ni Huasteca. Huajca se tamanti nahuat quitocaxtijque “Náhuat Oriental”, ni camanali quitequihuíaj nopa masehualme cati itztoquej ipan Municipios ten Atlapexco, Hidalgo huan ajsi hasta Ixhuatlan de Madero, Veracruz. Huan nopa seyoc tamanti náhuat quitocaxtijque: “Nahuat Occidental” ni camanali quitequihuíaj nopa masehualme ipan Municipios Tamazunchale, San Martín, Matlapa, Tampacán, Xilitla huan se parte ipan Municipio Huehuetlan, nochi ni Municipios mopantíaj ipan tali San Luis Potosí. Nojquiya quipantijque para onca sequin ranchos ten pehua nepa Chapulhuacanito hasta Huexota amo quitequihuíaj “tl”, inijuanti quitequihuíaj san “t” huajca ni tamanti náhuat quitocaxtijque “Nahuat Central”. Pero ni toicnihua Beller moilhuijque para nopa masehualme cati camanaltij “Nahuat Central” huelisquíaj quitequihuise Icamanal Toteco ipan “Náhuat Occidental” ten Tamazunchale. Huajca quema inijuanti huan inintapalehuijcahua pejque quinahuapataj Icamanal Toteco, san quichijque ipan náhuat Oriental huan Occidental. Quej nopa ipan xihuit l984, quisqui ten imprenta 5,000 Nuevos Testamentos ipan Náhuat Oriental huan oncac se hueyi ilhuit ipan se rancho itoca Itzocatl nepa ipan Municipio Atlapexco Hidalgo huan ipan seyoc chicome ranchos para quinextijque para ya onca Nuevos Testamentos ica náhuat. Ome xihuit teipa quisqui seyoc 5,000 Nuevos Testamentos ten nopa Náhuat Occidental ten Tamazunchale huan sequinoc Municipios ten San Luis Potosi. Pero amo oncayaya teno para nopa masehualme cati camanaltij nopa Nahuat Central.

Nopa masehualme cati camanaltij náhuat Oriental huan Occidental quiselijque nopa Nuevo Testamentos ica paquilisti huan nelía quitascamatilijque Tohueyiteco pampa quipixtoyaj Icamanal Toteco ipan ininnahuacamanal. Quema ya quipixtoyaj inin Nuevos Testamentos ininmaco, quinilhuijque nopa toicnihua Beller para quinequiyayaj nochi nopa Biblia ica náhuat. Huajca ipan l987 toicnihua Beller huan inintapalehuijcahua pejque tequitij chicahuac para quinahuapatase nopa Antiguo Testamento ten toBiblia, ten Genesis hasta Malaquías. Huan tequipanojque para diez y ocho xihuit ipan ya nopa. Pero noja nopa toicnihua ten camanaltij Nahuat Central quinilhuijyayaj para ohui quipohuase nopa “tl” huan quijnequiyayaj se Biblia nejmaxtic ten san quipiya “t” para inijuanti. Huajca toicnihua Beller momacaque cuenta para monequiyaya eyi Biblias para nochi masehualme cati camanaltij náhuat ipan ni Huasteca, huan ma quipiyaca se Biblia ten quimachilisquíaj cuali quej inijuantij camanaltij.

Tijmatij para ipan nochi taltipacti onca 6,000 idiomas, pero san 500 idiomas ten nopa 6,000 quipiyaj se Biblia nejmaxtic ica inincamanal pampa monequi miyac xihuit ten tequit huan miyac tomi para quipatase, huan quiquixtise ipan amat se Biblia nejmaxtic. Huajca para tojuanti eli se hueyi paquilisti para timechilhuise para ajsic tonali quema eyi (3) ten nopa 500 idiomas ipan taltepacti ten quipiya se Biblia nejmaxtic eltoc nica ipan la Huasteca.

Hasta ama ipan 2013 ya quistoc 29,000 Biblias ipan ni eyi tamanti Nahuat de la Huasteca. Sinta hueli titapohua ica Español, ica se ome horas huelis titapohuas ica náhuat. Nelía amo ohui para tijpohuas ni Icamanal Toteco ica Nahuat.

Huajca nohuampox, xijhuica moBiblia huan xijpohua huan xijneltoca ten ijcuilijtoc para timoscaltis ipan Toteco huan nojquiya xiquinpohuilica cati itztoque ipan amochajchaj, amotiopa huan campa hueli.

Nojquiya ama ajsic tonali para noquiya onca nopa Biblia ica Nahuat ipan internet. Hueli tijpantis ipan ni página www.huastecanahuatl.com Nica huelis tijpantis miyac versículos ipan moBiblia cati eltoc tatapejpenili para ma elis se tapalehuili para nochi masehualme ipan inintaneltoquilis ipan Toteco Icamanal.

Ni tequit quichiqui Tami Beller Gaddis ihuaya iichpocahua, yaya eli ininichpoca toicinihua Ricardo huan Patricia Beller. Yajuanti quipiya hueyi ininyolo ica masehualme cati camanaltij náhuat huan quinequij para ta no tiquiximatis Toteco quej motemaquixtijca.

Toicnihua Ricardo huan Patricia Beller ya itztoque ihuaya Toteco.

Huajca, xijpohua moBiblia ihuaya nochi tamachtili ten mitzpalehuis cati eltoc para ta nica ipan internet.

Tascamati, huan Toteco ma mitztiochihua.

XIMOCUEPA

TOCHAJ