XIJTEMO TOTECO

Toteco quinchijqui masehualme para ma quiiximatica.

Toteco quipiya nochi chicahualistli huan ya tlatzejtzeloltic pampa amo quipiya niyon se tlajtlacoli.

Pampa nochi timasehualme titlajtlacolchijtoque huan ni tlajtlacoli techtzacuilía para timonechcahuise campa Toteco.

Toteco tlahuel techicnelía huan quisencajqui quenicatza huelis timonechcahuise campa Ya. Pampa nochi nopa tlajtlacoli tlen techtzacuilía, Toteco quitlamilti quema Jesucristo motemactili para miquis ipan cuamapeli, quej ni techilhuía ipan Colosenses 2:13,14.

Toteco quipiya hueyi iyolo huan amo quinequi niyon se ma polihui nepa mictla. 2 Pedro 3:9

Yajaya mojmostla mitzchixtoc ximonechcahui para mitztlapojpolhuis. Quej ni techilhui’a ipan Apocalipsis 3:20 San quichixtoc xijtlapo moyolo pampa quipiya nochi chicahualistli para techtlapojpolhuis pampa san onca se ojtli para se masehuali ajsis campa itztoc Toteco, yajaya Jesucristo. Juan 14:6.

San xijmactili moyolo huan xiquilhui:

“Toteco, nijmati para san tlahuel nijchijtoc catli amo mitzpactía huan nijnequi techtlapojpolhui para huelis nimitznechcahuis pampa nijmati para ta amo hueli tiquita tlajtlacoli.”

Huan Toteco mitzselis pampa quiijtohua ipan Juan 6:37, sintla tihualas campa Ya amo quema mitzcuepas.

Huajca intla ama tijmactilijquiya moyolo Toteco, xijneltoca para ayacmo quema tiitztos moseltzi. Mateo 28:20b.

Pampa mitztlalilijtoc isello Itonal tlen tlatzejtzeloltic, ya nopa Itonal Toteco tlen nochipa mitzyoltlalis pampa ya nopa itequi. 2 Corintios 1:22

Huan para titlatzquitos nochipa ipan Toteco, xijpohua Icamanal mojmostla, xijcamahui mojmostla para tijmatis tlaque quinequi xijchihua.

Pampa Amocualtlacatl hualas huan quinequis ximocuepa para sempa xijchihua catli tijchihuayaya. Ipan 1 Juan 2:1 quiijtohua para tijpiyaj se totlatempalehuijca, yajaya Jesucristo.

Huajca ama tiicone Toteco huan monequi tinemis quen Ya pampa yaya nel tlatzejtzeloltic. 1 Pedro 1:15, pampa quej se tetaj quicuahuasashuía icone quema quichihua catli amo cuali, Toteco nojquiya mitzajhuas. Pero amo mitzquixtilis catli mitzmacatoc, ya nopa eli nemilistli tlen yancuic para nochipa 1 Juan.5:11-13. Nojquiya tijpiyaj tochaj nepa ilhuicac para sese catli tijneltocatoque, Juan 14:2.


Techmacatoc se tlanahuatili. Ma tiquinpohuilica sequinoc quenicatza Toteco Jesucristo motemactili ipan cuamapeli para huelis ticalaquise ilhuicac.

Icamanal Toteco:

Colosenses 2:13-14

Achtihuiya anitztoyaj quen anmictoque iixpa Toteco pampa san antlajtlacolchijtinemiyayaj huan amo anquitemohuayayaj Toteco pampa amo anisraelitame. Pero ama quena, Toteco anmechyolcuitoc ihuaya Cristo huan anmechtlapojpolhuijtoc nochi amotlajtlacolhua.Sesen tojuanti tijpixtoyaj quen se amatl catli techtelhuiyaya tlen tlajtlacoli tijchijtoyaj huan catli titlahuicayaya iixpa Toteco. Pero Cristo quitlali nopa amatl ica totlajtlacolhua ipan icuamapel huan nepa quisemanqui nochi catli ica techtelhuiyaya. Quichijqui ni quema mijqui por tojuanti.

2 Pedro 3:9

Toteco amo quielcajtoc catli quiijtojtoc quen sequin moilhuíaj. Techtencahuilijtoc para sempa hualas, huan temachtli hualas. Pero ama yaya quichiya pampa nelía quipiya iyolo ica tojuanti huan quinequi nochi ma timoyolpatlaca huan tijcahuase totlajtlacolhua. Amo quinequi niyon se ma polihui para nochipa.

Apocalipsis 3:20

Xiquita, nimoquetza campa puerta huan nimitznotza. Sintla techtoscacaquis huan techcaltlapos, nicalaquis huan nitlacuas mohuaya huan tielis tinohuampox.

Juan 14:6

Huan Jesús quiilhui: ―Na niojtli, nitehuica ilhuicac. Na niitztoc catli melahuac, huan nitemaca nemilistli yancuic para nochipa. Amo aqui huelis ajsiti campa itztoc noTata nepa ilhuicac sintla amo nechneltoca.

Juan 6:37

Nochi masehualme catli noTata quintlapejpenijtoc para nechmacas, hualase campa na, huan catli hualase campa na, na amo quema niquincuepas.

2 Corintios 1:22

Quena, Toteco quitlalijtoc isello ipan tojuanti para ma nesi tiiaxcahua. Huan yaya techmacatoc Itonal ipan toyolo quen se tlayacanca tomi catli technextilía para temachtli techmacas nochi catli techtencahuilijtoc masque noja polihui para techmacas.

1 Juan 2:1

Noconehua catli nimechicnelía, nimechtlajcuilhuía nochi ni tlamantli para amo xitlajtlacolchihuaca. Pero sintla se acajya tlajtlacolchihuas, tijpiyaj se totlatempalehuijca catli itztoc iixpa Toteco Totata. Totlatempalehuijca yaya Jesucristo catli quichihua san catli senquistoc cuali.

1 Pedro 1:15

Tlatzejtzeloltic Toteco catli anmechnotztoc para xiitztoca aniconehua; huajca amojuanti nojquiya xiitztoca antlatzejtzeloltique huan xijchihuaca catli senquistoc cuali.

1 Juan 5:11-13

Huan ya ni catli Toteco techyolmelahua: Toteco techmacatoc nemilistli catli yancuic huan ni nemilistli catli yancuic eltoc ipan Icone Jesucristo. Yaya catli quipiya Icone Toteco ipan iyolo quipiya nemilistli catli yancuic, pero catli amo quipiya Icone, amo quipiya nopa nemilistli.

Juan 14:2

Nepa ilhuicac campa ichaj noTata onca miyac calme para ipan anitztose. Sintla amo melahuac, nimechilhuijtosquía. Na niyas nepa nimechchijchihuiliti amochajchaj campa anitztose.

XIMOCUEPA

TOCHAJ