Netlatlajtili: Ticamanaltis ihuaya Toteco Dios

Toteco nelía miyac mitzicnelía ta. Huan Yaya quinequi para ticamanaltis ihuaya. ¡Amo ximopinahua, san xipehua! ¡Amo xijchiya! ¡Amo xijcahua! San xiya campa amo aqui mitzitas o mitztlacaquilis (quej quiijtos nica ipan Icamanal Toteco). Huan xicamanalti ihuaya Ya pampa itztos mohuaya huan monecha quen se mohuampox. Ximotlatlajti ica Toteco Dios toTata huan ipan itoca Icone Jesús. Toteco itztos mohuaya nochipa. Huan Toteco amo quema mitzcajtehuas. Xijpohua ni Icamanal Toteco nochi tonali huan Yaya mitzpalehuis huan mitznextilis quenicatza tijnejnemis.

Jeremias 29:11-12

Pampa na nijmati cuali nopa tlamantli catli nijsencajtoc para amojuanti,” quiijtohua TOTECO. “Nijsencajtoccatli cuali huan amo catli fiero, para nochi quisas cuali para amojuanti teipa huan para anquiselise catli anquichiyaj. Huan ipan nopa tonali amojuanti anhualase anmotlatlajtise ica na, huan na nimechtlacaquilis.

Filipenses 4:6-7

Ayacmo ximotequipachoca ica niyon se tlamantli. Más cuali ximotlatlajtica ica Toteco ipan nochi catlianmechpanotihuala. Xijtlajtlanica ma anmechmaca nochi catli monequi huan xijtlascamatica ica nochi catlianmechchihuilijtoc. Sintla quej nopa anquichihuaj, Toteco anmechmacas se tlasehuilistli ipan amoyolo catlimasehualme amo hueli quimachilise. Huan nopa tlasehuilistli quiyahualtzacuas amoyolo huan amotlalnamiquilis huanquinmocuitlahuis pampa Toteco anmechtlatzquiltijtoc ipan Cristo.

Mateo 6:5-8

“Huan quema anmotlatlajtíaj ica Toteco, amo xijchihuaca quen masehualme catli moijixpatlani quichihuaj. Inijuanti quinpactía moquetzase tiopan calijtic o callejtipa huan nepa motlatlajtíaj ica Toteco san para sequinoc ma quinitaca. Sintla masehualme quinhueyimatise, san ya nopa quiselise pampa Toteco amo quintlaxtlahuis. Pero amojuanti quema anmotlatlajtíaj ica Toteco Dios, xiyaca campa más calijtic huan xijtzacuaca cuapuerta huan Toteco amoTata catli itztoc nepa calijtic amohuaya quiitas huan anmechtlaxtlahuis tlamiyacapa.“Huan quema anmotlatlajtíaj ica Toteco Dios, amo xijchihuaca quen masehualme catli amo quiiximatij Toteco. Inijuanti san quiompahuíaj miyac huelta se camanali catli quitzontecomajtoque pampa moilhuíaj sintla huejcahuase camanaltise, Toteco quincaquis. Huajca amo xijchihuaca quen inijuanti, pampa amoTata ya quimati tlaque anmechpolohua hasta quema ayamo anquitlajtlaníaj.

Romanos 8:26-27

Huan nojquiya Itonal Toteco techpalehuía pampa amo tijmachilíaj nochi huan amo tijmatij tlaque monequitijtlajtlanise Toteco quema timotlatlajtíaj. Huan Itonal Toteco iseltzi motlatlajtía chicahuac ica Toteco Dios por tojuantihuan Itonal ayijtía pampa quiilhuía Toteco catli amo aqui hueli quiijtohua ica camanali. Huan Toteco Dios catliquitlachilía ininyolo nochi masehualme, quimati catli Itonal quinequi para tojuanti, pampa Itonal Toteco quitlajtlaníatlamantli catli Toteco Dios no quinequi ma tijpiyaca tojuanti catli yaya techiyocatlalijtoc para tiiaxcahua.

Marcos 11:22-26

Huan Jesús quinnanquili:―Ximotemachica ipan Toteco, huan melahuac aqui hueli masehuali catli quiilhuis ni tepetl: ‘Ximoquixti huan ximomajcahua ipan hueyi atl’, sintlatemachtli quineltocas ica nochi iyolo para panos catli quiijtojtoc, Toteco quichihuilis. Yeca nimechilhuía, nochi catlianquitlajtlanise Toteco quema anmotlatlajtíaj, xijneltocaca para anquiselise huan Toteco anmechmacas. Huan quemaanmotlatlajtíaj ica Toteco, xijtlapojpolhuica aqui hueli catli ica ancualanij para quej nopa amoTata catli itztoc ilhuicacnojquiya anmechtlapojpolhuis amotlaixpanolhua. Pampa sintla amo anquintlapojpolhuíaj sequinoc, huajcaToteco amoTata catli itztoc ilhuicac nojquiya amo anmechtlapojpolhuis amotlaixpanolhua.

Santiago 1:2-8

Noicnihua, xiquitaca para se hueyi paquilistli quema anmechpanotihuala tlaohuijcayotl. Anquimatij paratlaohuijcayotl quiyejyecohua amotlaneltoquilis huan quichihua para más xijpiyaca amoyolo para antlaijiyohuise. Huajca xijpiyaca amoyolo para cuali xiquijiyohuica nochi catli anmechpanotihuala para anelise quen catli moscaltijtoquehuan motlacachijtoque ipan Toteco. Huan anquipiyase senquistoc cuali amotlalnamiquilis huan quej nopa amo tlenoanmechpolos. Sintla se tlen amojuanti quimonequilía más tlalnamiquilistli pampa amo quimati tlaque ipaquilis Toteco ipan inemilis, ma quitlajtlani Toteco huan yaya quimacas. Yaya catli temaca miyac tlalnamiquilistli, huan amo quiajhuas pampaquitlajtlanía. Pero quema se quitlajtlanía Toteco, monequi quineltocas para temachtli Toteco quipalehuis, huan quejnopa, quena, quipalehuis. Ma amo moilhui: “Huelis Toteco nechpalehuis o huelis amo.” Pampa catli moilhuía quej nopaitztoc quen nopa hueyi atl catli yohui campa ajacatl quicuatopehua. Catli amo quineltoca para temachtli Totecoquipalehuis, ma amo mochiya, pampa Toteco amo tleno quimacas. Nopa masehuali amo temachtli pampa quipiya omeitlalnamiquilis, huan amo quema quimatis catli melahuac quichihuas ipan inemilis.

Lucas 11:1-13

Se tonal Jesús moiyocaquixtijtoya huan motlatlajtiyaya campa momatqui yohui. Huan teipa quema tlanqui, seimomachtijca quinechcahuico huan quiilhui:― Tohueyiteco, techmachti quenicatza ma timotlatlajtica quen Juan quinmachti imomachtijcahua. Huan Jesús quinilhui:―Quema anmotlatlajtíaj ica Toteco Dios, xiquilhuica:Toteco Totata, ta catli tiitztoc nepa ilhuicac.Nochi masehualme ma mitzhueyichihuaca [O Ma quihueyichihuaca motoca]. Xihuala xitlanahuatiqui nica. Nochi masehualme ma quichihuaca catli ta tijnequi nica ipan ni tlaltipactli,quen nochi quichihuaj mopaquilis nepa ilhuicac. Techmaca nopa tlacualistli catli monequi mojmostla. Techtlapojpolhui totlajtlacolhua,quen nojquiya tiquintlapojpolhuíaj catli techixpanoj.Amo aqui xijcahuili ma techyoltilanas para titlajtlacolchihuase. Techmanahui ica yaya catli amo cuali. Huan Jesús quinilhui nojquiya:―Ximoilhuica sintla tlajco yohual se tlen amojuanti yas ichaj se amohuampox huan quiilhuis: ‘Nohuampox, techtlanejti seome pantzi, pampa se nohuampox ajsico huan huejca huala, huan amo tleno nijpiya para nijmacas.’ Huan huelis mohuampoxmitznanquilis ya caltzactoc huan mitzilhuis: ‘Amo techcuatotoni. Ya nimocaltzactoc, huan noconehua ya itztoque nohuayaipan tlapechtli. Amo hueli nimehuas para nimitzmacas catli tijnequi.’ Nimechilhuía, huelis yaya amo mehuas paramitzmacas catli tijtlajtlanía pampa tiihuampox, pero sintla amo tijcahua tijtlajtlanía catli tijnequi, yaya mehuas huanmitzmacas nochi catli tijtlajtlanía san pampa quinequis ayacmo xijcuatotoni más. Huajca nimechilhuía, xijtlajtlanicaToteco para nopa catli anmechpolohua, huan yaya anmechmacas. Xijtemoca catli anmechpolohua huan anquipantise. Xijnotzaca Toteco huan yaya anmechcaltlapos. Pampa nochi catli tlajtlanij, quiselíaj. Huan nochi catli quitemohuajcatli quinpolohua, quipantíaj. Huan nochi catli quinotzaj Toteco, yaya quincaltlapohua huan quinmaca catli quitlajtlaníaj. “Huan amojuanti catli anquinpiyaj amoconehua, sintla se mocone mitztlajtlanis se pantzi para quicuas, amo tijmacas setetl. Huan sintla mocone mitztlajtlanis se michi para quicuas, amo tijmacas se cohuatl. Huan sintla moconemitztlajtlanis se tecsistli, amo tijmacas se colotl ma quicua. Pampa masque antlajtlacolchihuani, anquimatijanquinmacase amoconehua catli cuali. Huajca achi más Totata catli itztoc ilhuicac quimati quinmacas iconehua catli cuali, huan yaya quinmacas Toteco Itonal nochi catli quitlajtlanise.”

Efesios 3:20

Ma tijhueyimatica Toteco Dios catli quipiya chicahualistli para quichihuas onpano más miyac huan amo quen nochicatli hueli tijtlajtlaníaj o hueli timoilhuíaj. Huan quichihuas ica ichicahualis catli ya tequiti ipan tojuanti.

Hebreos 4:14-16

Yeca tojuanti tijpiyaj se tohueyi totajtzi catli ya ajsito ipan ilhuicac, yaya Jesús, Icone Toteco. Huajca nochipama timotemachica ipan ya quen tiquijtojtoque tlamiyacapa para tijchihuaj. Inon tohueyi totajtzi techtlasojtla quemaamo tijpiyaj fuerza para tijchihuase catli xitlahuac, pampa nochi tlamantli tlajtlacoli nojquiya quiyoltilanqui Jesús quentojuanti techyoltilana mojmostla, pero yaya amo quema tlajtlacolchijqui. Huajca ma timonechcahuica ica temachilicampa mosehuijtoc Toteco catli nochi quinahuatía. Huan ma amo timajmahuica tijtlajtlanise itlapalehuil, pampatemachtli techtlasojtlas huan techpalehuis ipan tlen hueli tlatoctzi quema más monequi pampa hueyi iyolo ica tojuanti.

Santiago 5:16c

Quema se masehuali catli itztoc xitlahuac iixpa Toteco quitlajtlaníaToteco chicahuac para se tlamantli, huajca Toteco quichihuas.

1 Pedro 3:12

Pampa Toteco quinmocuitlahuía catli xitlahuac iixpa.Tlacactoc quema motlatlajtíaj.Pero Toteco moicancuepa ica catli quichihuaj catli amo cuali.”

Proverbios 15:29

TOTECO mohuejcatlalijtoc tlen masehualme catli fiero ininnemilis, pero quintlacaquilía quema motlatlajtíajmasehualme catli itztoque xitlahuaque iixpa.

Mateo 6:9-15

Huajca quema anmotlatlajtise ipan Toteco, xiquilhuica quej ni: "Toteco Totata catli tiitztoc nepa ilhuicac.Nochi masehualme ma quihueyichihuaca motoca. [O Ma mitzhueyichihuaca.] Xihuala, xitlanahuatiqui nica. Ma quichihuaca mopaquilis nochi ipan ni tlaltipactli quen mochijtoc nepa ilhuicac. Techmaca nopa tlacualistli catli monequi mojmostla. Techtlapojpolhui totlajtlacolhua, quen tojuanti nojquiya tiquintlapojpolhuíaj catli techixpanoj. Amo aqui xijcahua ma techyoltilana ma titlajtlacolchihuase. Techmanahui tlen yaya catli amo cuali.Pampa ta moseltzi tijpiya tequiticayotl para nochi tijnahuatis. San ta tijpiya nopa chicahualistli catli más hueyi.Huan san ta tijpiya motlatlanex huan quej nopa elis para nochipa.San ya nopa.’“Pampa sintla anquintlapojpolhuise masehualme catli anmechixpanotoque, huajca amoTata catli itztoc nepa ilhuicac anmechtlapojpolhuis amotlaixpanolhua nojquiya. Pero sintla amo anquintlapojpolhuíaj masehualme catli anmechixpanoj, huajca amoTata amo anmechtlapojpolhuis amotlaixpanolhua.

Nojquiya xijtlachili ipan nopa Topicas:
Netlatlajtili: Ximotlatlajti ica Toteco

XIMOCUEPA

TOCHAJ