Occidental Tlaijiyohuilistli, Tlamachtilistli huan Tlayejyecolistli

2 Corintios 4:16-18	Yeca amo techcuesihuilía totequi, pampa masque tlantinemi tonemilis, mojmostla Toteco techmaca yancuic chicahualistli ipan totonal. Masque titlaijiyohuíaj se pilquentzi para se tlatoctzi ipan ni tlaltipactli, amo quenijqui. Tijmatij por ni tlaijiyohuilistli, Toteco techmacas catli tlahuel yejyectzi catli huejcahuas para nochipa. Yeca tojuanti amo timoilhuíaj tlen ni tlaijiyohuilistli huan tlamantli catli ama tiquitaj, pero timoilhuíaj tlen nopa tlamantli catli amo aqui hueli quiita ama. Pampa nochi catli ama tiquitaj eltos san para se tlatoctzi, pero nopa tlamantli catli ama noja amo hueli tiquitaj catli Toteco quitencahuilijtoc para techmacas, ya nopa eltos para nochipa.
1 Pedro 1:6-7	Huajca xiyolpaquica, masque ama para se tlatoctzi monequi anquiijiyohuise miyac tlamantli tlayejyecoli. Quena, quen masehualme quiyejyecohuaj oro ipan tlitl para quipiyase oro catli senquistoc cuali, quej nopa Toteco nojquiya quichihua ica amojuanti. Yaya quicahuilía para ma huala tlaijiyohuilistli para quiyejyecos amotlaneltoquilis para quiitas sintla senquistoc anquineltocaj. Quema Toteco quiyejyecohua amotlaneltoquilis, más quipatiita huan amo quen oro catli más cuali. Huan sintla Toteco quiitas para senquistoc cuali anquineltocaj Jesucristo, huajca ipan nopa tonal quema sempa hualas Tohueyiteco Jesucristo yaya anmechxochimacas, anmechhueyitlalis huan yaya quinnextilis nochime quenicatza miyac anmechtlepanita.
Romanos 8:18	Pero tiquitaj para amo tleno nopa pilquentzi catli titlaijiyohuíaj ama, quema timoilhuíaj quenicatza tielise teipa quema Toteco techhueyitlalis para nochi quiitase.
Romanos 12:12	Xipaquica miyac para nochi catli yejyectzi catli techchiya nepa ilhuicac. Xijpiyaca amoyolo quema antlaijiyohuíaj. Ica nochi amoyolo mojmostla ximotlatlajtica ica Toteco.
Romanos 8:28	Huan tijmatij nochi tlamantli catli techpanotihuala, masque cuali o amo cuali, nochi quisas cuali para tojuanti catli tiquicnelíaj Toteco, catli Toteco technotztoc para tiiaxcahua pampa quej nopa quitlalijtoya.
2 Corintios 1:3-7	Ma tijtlascamatica Toteco Dios, yaya catli iTata Tohueyiteco Jesucristo. Yaya catli techtlasojtla huan tlatoctzitzi techyoltlalía. Yaya techyoltlalía ipan nochi nopa tlaohuijcayotl catli techpanotihuala huan quej nopa quichihua para tojuanti nojquiya tihuelise tiquinyoltlalise sequinoc catli itztoque ipan tlaohuijcayotl san se quen Toteco techyoltlalijtoc. Quema tojuanti miyac titlaijiyohuíaj pampa tiiaxcahua Cristo, Toteco miyac techtiochihua huan Cristo miyac techyoltlalía. Huan tojuanti titlaijiyohuijtoque miyac pampa tijnequij amojuanti xiyolpactoca huan para nelía ximomaquixtica ipan Jesucristo. Huan quema Toteco techyolchicahua, quej nopa quichihua para tojuanti nojquiya huelis timechyolchicahuase. Quinequi timechpalehuise para anquipiyase yoltetili huan amo anhuetzise quema anpanose ipan tlaijiyohuilistli quen tojuanti. Tojuanti timotemachíaj ipan Toteco para yaya anmechyolchicahuas quen techyolchicajtoc pampa nojquiya antlaijiyohuíaj quen tojuanti.
2 Corintios 12:9-10	pero yaya nechilhui: “Hueyi noyolo ica ta huan san ya nopa monequi. Nochicahualis achi más mopannextía quema se masehuali amo quipiya tetili.” Huajca yeca nipaqui pampa amo nitetic, pampa quej nopa monextía ipan na ichicahualis Cristo. Quena, nipaqui pampa amo nitetic huan nipaqui quema masehualme nechtlaijilhuíaj. Nipaqui quema amo nijpiya catli notechmonequi huan quema masehualme nechtlaijiyohuiltíaj. Nipaqui quema nijpano tlaohuijcayotl pampa niquiximati Cristo. Pampa quema amo nijpiya tetili, nimocuepa nitetic pampa Cristo nechmaca tlen ya ichicahualis.
Salmos 91	Catli motlatzquilijtoc ipan Toteco Dios Catli Más Hueyi itztos temachtli imaco, pampa mocahuas ica Toteco Catli Quipiya Nochi Chicahualistli. Huan na niquijtos tlen TOTECO para yaya nechmocuitlahuía ica ihueyi chicahualis. Yaya noTeco Dios huan san ipan ya nimotemachía. Pampa san yaya hueli mitzmanahuis tlen nochi tlaquetztli catli sequinoc quintlatise para mitzmasiltise. Mitzmocuitlahuis para amo mitzajsis nopa cocolistli catli tetzontlamiltía. Quen se tenampillo quintlatía ipilconehua ieltlapaltzala, Toteco quej nopa nojquiya mitzmocuitlahuía. Temachtli mitzchihuilis nochi catli mitztlajtolcahuilijtoc, pampa timotemachijtoc ipan ya para mitzmanahuis. Huajca ama ayacmo ximajmahui ica tlayohua, niyon amo xiquimacasi catli hueli panos ipan tonaya. Amo xiquimacasi nopa tlaijiyohuilistli catli huala ipan tzintlayohuilotl, niyon nopa miquilistli catli ajsi ica tlajcotona. Masque monechca miquise mil o majtlactli mil masehualme, pero ta amo mitzajsis. Ica moixteyol tiquitas quenicatza quiselise tlatzacuiltili nopa tlaixpanoca tlacame. Sintla timotemachijtoc ipan TOTECO para mitzmocuitlahuis, huan timochiya ipan Toteco Catli Más Hueyi para mitzpalehuis, huajca amo mitzajsis niyon se tlamantli catli amo cuali, niyon amo quiajsis mochaj. Pampa Toteco quintitlanis itequihuajcahua para ma mitzmocuitlahuica, huan mitzmocuitlahuijtinemise campa hueli ta tiyas. Huan itequihuajcahua mitztlananase ica ininmax para amo timotepotlamis ipan ojtli. Niyon amo timajmahuis masque tijquetzas moicxi ipan se león o se cohuatl catli temictía. Quena, amo tleno mopantis masque timoquejquetzas ininpani. Pampa Toteco Dios quiijtohua: “Na nijmanahuis pampa nechicnelía. Nijhueyitlalis pampa motemachía ipan na. Quema nechtzajtzilis, na nijnanquilis. Nojquiya niitztos ihuaya quema quipiyas tequipacholi. Nijmanahuis huan nijhueyitlalis. Nijchihuas ma itzto tlahuel miyac xihuitl huan nijmaquixtis.”
2 Corintios 6:3-10	Tijchihuaj campica para tijchihuase nochi catli cuali para amo aqui ma quihuejcamajcahuas Toteco por catli tijchihuaj tojuanti. Amo tijnequij para niyon se huelis techejelnamiquis, niyon quitlaijilhuis totequi pampa tijchijtoque catli amo monequi. Quena, nochi catli tijchihuaj, quinextía para melahuac tiitequipanojcahua Toteco. Tijpiyaj toyolo masque techtlaijiyohuiltíaj masehualme, o amo tijpiyaj catli techmonequilía o tijpanoj miyac tlaohuijcayotl. Tiquijiyohuíaj masque masehualme techmaquilíaj, techtzacuaj o mosisiníaj tohuaya. Quemantic titequitij hasta campa ayacmo tihuelij. Quemantic amo techcahuaj ma ticochica huan quemantic timayanaj pampa amo tleno tijpiyaj para tijcuase. Pero tojuanti titenextilíaj para tijpiyaj se tonemilis catli tlapajpactic huan para cuali tiquiximatij Icamanal Toteco. Nochi quiitaj para tijpiyaj toyolo ica nochi masehualme huan tiquinchihuilíaj catli cuali. Tlanemijya nesi para Itonal Toteco tequiti ipan toyolo huan para titeicnelíaj miyac. Ica cuali toyolo titeyolmelahuaj catli senquistoc melahuac. Huan masehualme quiitaj para ichicahualis Toteco Dios tequiti ipan tonemilis. Huan pampa tiitztoque tixitlahuaque iixpa Toteco, tijpiyaj nochi catli monequi para titlahuilanase huan timomanahuise ica yaya catli amo cuali. Tojuanti tijtequipanohuaj Toteco masque masehualme techtlepanitaj o techcualancaitaj. Amo tijquetzaj totequi masque masehualme camanaltij cuali tlen tojuanti huan techtlascamatilíaj, o techtlaijilhuíaj. Masque sequin masehualme techitaj quen titlacajcayahuani, tojuanti ticamanaltij catli senquistoc melahuac. Masque nochi masehualme campa hueli techiximatij, miyac techitaj quen elisquía amo techiximatij. Quemantic timopantíaj nechca miquilistli, pero noja tiitztoque. Quemantic tlahuel techtlatzacuiltíaj huan quinequij techtzontlamiltise, pero noja amo techmictijtoque. Masque tijpanoj tequipacholi, nochipa tipactoque. Masque titeicneltzitzi, tiquinricojchihuaj miyac masehualme para ma quipiyaca catli tlahuel ipati nepa iixpa Toteco. Quemantic nesi para amo tleno tijpiyaj, pero tijpiyaj nochi tlamantli catli más monequi.
Salmos 34:15-22	TOTECO quintlachilía catli nemij xitlahuac iixpa, huan san quichiya para quinmacas catli quitlajtlanise. Pero TOTECO sencualantoc ica inijuanti catli quichihuaj catli fiero. Quintzontlamiltis para ma ayacmo aqui quinelnamiquis ipan ni tlaltipactli. Quema masehualme catli itztoque xitlahuaque iixpa TOTECO quitzajtzilíaj, yaya quintlacaquilía. Huan quinmanahuía tlen nochi inincuesolhua. TOTECO itztoc ininnechca masehualme catli motequipachohuaj. Huan quinmaquixtía catli motequipachohuaj ica inintlajtlacolhua. Se masehuali catli itztoc xitlahuac iixpa TOTECO quipiya miyac tequipacholi, pero TOTECO quimanahuía ica nochi catli ipanti. Pampa TOTECO quimocuitlahuía para amo postequis niyon se iomiyo. Se masehuali catli fiero inemilis miquis por nopa tlamantli fiero catli quichihua. Quena, TOTECO quintlalilis tlatzacuiltili catli quicualancaitaj catli cuali. TOTECO quinmaquixtía itequipanojcahua. Quena, quintlapojpolhuía imasehualhua catli motemachíaj ipan ya.
Salmos 121	Quema nijtlanana noixayac, huan nitlachiyas ipan nopa tepeme, nimoilhuía: ¿Canque huala notlapalehuil? Notlapalehuil huala tlen TOTECO, yaya catli quichijchijqui ilhuicactli huan tlaltipactli. Yaya amo quema mitzcahuilis para timotepotlamis o tihuetzis. Yaya mitzmocuitlahuis huan amo monequi cochis. Quena, TOTECO catli quinmocuitlahuía israelitame amo ixijcopi, niyon amo cochi. TOTECO yaya mitzmocuitlahuía. Yaya itztoc monechca para mitzmanahuis. Yaya mitzmocuitlahuía tonaya huan tlayohua. TOTECO mitzmocuitlahuis para amo mitzajsis niyon se tlamantli catli amo cuali. Quena, yaya quimocuitlahuis monemilis. TOTECO yaya mitzmocuitlahuis campa hueli tiyas o tihualas, ama huan para nochipa.

Ximomachti	Xijtemo Más	Xijcaqui	Xijtlachili
Isaías 40:29-31 Mateo 19:29-30 Juan 15:18-21 1 Pedro 5:7-11 1 Pedro 4:12-19 Hechos 16:16-40 Romanos 8:31-39 Lamentaciones 3:22-33 Salmos 46:1-3 Mateo 7:13-14