XIJTEMO TOTECO

Toteco quinchijqui tlacame para ma quiixmatica.

Toteco quipiya nochi chicahualistli huan ya tlatzejtzeloltic pampa ax quipiya niyon se tlajtlacoli.

Pampa nochi tlacame titlajtlacolchijtoque huan ni tlajtlacoli quitzacuilía para tijnechcahuise Toteco.

Pero Toteco tlahuel techicnelía huan quisencajqui para ma tijnechcahuica. Pampa nochi nopa tlajtlacoli tlen techtzacuilía, Toteco quixolejqui quema Jesucristo motemactili para miquis ipan cuamapeli, queja ni techilhuía ipan Colosenses 2:13,14.

Toteco quipiya hueyi iyolo huan ax quinequi niyon se ma mopolo nepa mictla. 2 Pedro 3:9

Yajaya mojmostla mitzchixtoc ximonechcahui para mitztlapojpolhuis. Queja ni techilhuía ipan Apocalipsis 3:20 san quichixtoc xijtlapo moyolo pampa quipiya nochi chicahualistli para techtlapojpolhuis pampa san onca se ojtli para se tlacatl ajsis campa itztoc Toteco, yajaya Jesucristo. Juan 14:6

San xijmactili moyolo huan xiquilhui:

“Toteco nijmati para san tlahuel nijchijtoc tlen ax mitzpactía huan nijnequi xinechtlapojpolhui para huelis nimitznechcahuis pampa nijmati para ta ax hueli tiquita tlajtlacoli.”

Huan Toteco mitzselis pampa quiijtohua ipan Juan 6:36: intla tihualas campa ya ax quema mitzcuepas.

Huajca intla ama tijmactilijquiya moyolo Toteco, xijneltoca para ayoc quema tiitztos moselti. Mateo 28:20b.

Pampa mitztlalilijtoc isello Itonal tlen tlatzejtzeloltic, ya nopa Itonal Toteco tlen nochipa mitzyoltlalis pampa ya nopa itequi. 2 Corintios 1:22

Huan para titlatzquitos nochipa ipan Toteco, xijpohua Icamanal mojmostla, xijcamahui mojmostla para tijmatis tlachque quinequi xijchihua.

Pampa Axcualtlacatl hualas huan quinequis ximocuepa xijchihua tlen tijchihuayaya. Ipan 1 Juan 2:1 quiijtohua para tijpiya motlatempalehuijca yajaya Jesucristo.

Huajca ama tiicone Toteco huan monequi tinemis queja ya, pampa ya tlatzejtzeloltic. 1 Pedro 1:15, pampa queja se conetl quicuahuasashuía itata quema quichihua tlen ax cuali, Toteco nojquiya mitzajhuas. Pero ax mitzquixtilis tlen mitzmacatoc, ya nopa yolistli tlen yancuic para nochipa 1 Juan 5:11-13. Nojquiya tijpiyaj tochaj nepa elhuicac para se se tlen tijneltocatoque, Juan 14:2.


Techmacatoc se tlanahuatili. Ma tiquinpohuilica sequinoc quejatza Toteco Jesucristo motemactili ipan cuamapeli para huelis calaquise elhuicac.

Canque ijcuilijtoc ipan Itlajtol Toteco:

Colosenses 2:13-14

Achtohuiya initztoyaj queja inmictoque iixpa Toteco pampa san intlajtlacolchijtinemiyayaj huan ax inquitemohuayayaj Toteco pampa ax inisraelitame. Pero ama quena, Toteco inmechyolitijtoc ihuaya Cristo huan inmechtlapojpolhuijtoc nochi imotlajtlacolhua. Sesen tojuanti tijpixtoyaj queja se amatl tlen techteilhuiyaya tlen tlajtlacoli tijchijtoyaj huan tlen titlahuicayaya iixpa Toteco. Pero Cristo quitlali nopa amatl ica totlajtlacolhua ipan icuamapel huan nepa quixolejqui nochi tlen ica techteilhuiyaya. Quichijqui ni quema mijqui topampa.

2 Pedro 3:9

Toteco ax quiilcajtoc tlen quiijtojtoc queja sequin moilhuíaj. Techtencahuilijtoc para sampa hualas, huan temachtli hualas. Pero ama yajaya quichiya pampa nelía quipiya iyolo ica tojuanti huan quinequi nochi ma timoyolpatlaca huan tijcahuase totlajtlacolhua. Ax quinequi niyon se ma polihui para nochipa.

Apocalipsis 3:20

“Xiquita, nimoquetza campa puerta huan nimitznotza. Intla tinechtoscaquis huan tinechcaltlapos, nicalaquis huan nitlacuas mohuaya huan tielis tinohuampo.

Juan 14:6

Huan Jesús quiilhui: ―Na niojtli, nitehuicas elhuicac. Na niitztoc tlen melahuac huan nitemacas yolistli yancuic para nochipa. Axaca huelis ajsis campa itztoc noTata nepa elhuicac intla ax nechneltoca.

Juan 6:37

Nochi tlacame tlen noTata quintlapejpenijtoc para nechmacas, hualase campa na, huan tlen hualase campa na, na ax quema niquincuepas.

2 Corintios 1:22

Quena, Toteco quitlalijtoc isello ipan tojuanti para ma nesi tiiaxcahua. Huan yajaya techmacatoc Itonal ipan toyolo queja se tlayacanca tomi tlen technextilía para temachtli techmacas nochi tlen techtencahuilijtoc yonque noja polihui para techmacas.

1 Juan 2:1

Noconehua tlen nimechicnelía, nimechtlajcuilhuilía nochi ni tlamantli para amo xitlajtlacolchihuaca. Pero intla se acajya tlajtlacolchihuas, tijpiyaj se totlatempalehuijca tlen itztoc iixtla Toteco Totata. Totlatempalehuijca yajaya Jesucristo tlen quichihua san tlen senquistoc cuali.

1 Pedro 1:15

Tlatzejtzeloltic Toteco tlen inmechnotztoc para xiitztoca iniconehua; huajca imojuanti nojquiya xiitztoca intlatzejtzeloltique huan xijchihuaca tlen senquistoc cuali.

1 Juan 5:11-13

Huan ya ni tlen Toteco techyolmelahua: Toteco techmacatoc yolistli tlen yancuic huan ni yolistli tlen yancuic eltoc ipan Icone Jesucristo. Yajaya tlen quipiya Icone Toteco ipan iyolo quipiya yolistli tlen yancuic, pero tlen ax quipiya Icone, ax quipiya nopa yolistli.

Juan 14:2

Nepa elhuicac campa ichaj noTata onca miyac caltini para ipan initztose. Intla ax melahuac, nimechilhuijtosquía. Na niyas nepa nimechchijchihuiliti imochajchaj campa initztose.

XIMOCUEPA

TOCHAJ