TOJUANTI: ORIENTAL

Quejatza panotihualajqui nopa Biblia ica Nahuatl

Huejcajquiya ipan 1945, nepa ipan Municipio Tamazunchale San Luis Potosí, itztoya se toicni eliyaya Juan Dale; yajaya momachti náhuatl, huan tequipanoyaya ipan se caltlamachtli campa quinmachtiyayaj quejatza tepohuilise Itlajtol Toteco, ni toicni nojquiya tepaxalohuayaya ipan ranchos ica tlacame tlen camatiyayaj náhuatl huan quinpohuiliyaya Itlajtol ica nahuatl, huajca quinejqui mas ma quimachilica Itlajtol Toteco, yajaya quinahuapatlac nopa Evangelio San Juan, huan quichijqui se pilamatzi para tlacame ipan ranchos, pero ax quipixqui tonali para quipatlas más Itlajtol Toteco.

Ipan 1970 sequinoc toicnihua, tlen inintoca Ricardo huan Patricia Beller, pejque momachtíaj náhuatl ipan se rancho tlen itoca Cuatenahuatl ipan Municipio tlen Huautla, Hidalgo; pampa Toteco quinnotztoya para quitequipanose huan quinahuapatlase Itlajtol para tlacame nicani huan quichihuase se diccionario. Nepa ipan Cuatenahuatl quinpalehuijque tlacame ica pajtli, huan quichijque se curso para sequinoc nojquiya ma huelise camatise ica náhuatl. Teipa pejque quipatlaj Itlajtol Toteco ica náhuatl. Quema ya tequipanojtoyaj se ome xihuitl, quipantijque para onca eyi tlamantli náhuatl tlen mopatla ipan ni Huasteca. Huajca se tlamantli nahuatl quitocaxtijque “Náhuatl Oriental”, ni tlajtoli quitequihuíaj nopa tlacame tlen itztoquej ipan Municipios tlen Atlapexco, Hidalgo huan ajsi hasta Ixhuatlan de Madero, Veracruz. Huan nopa seyoc tlamantli náhuatl quitocaxtijque: “Nahuatl Occidental” ni tlajtoli quitequihuíaj nopa tlacame ipan Municipios Tamazunchale, San Martín, Matlapa, Tampacán, Xilitla huan se parte ipan Municipio Huehuetlan, nochi ni Municipios mopantíaj ipan tlali San Luis Potosí. Nojquiya quipantijque para onca sequin ranchos tlen pehua nepa Chapulhuacanito hasta Huexotla ax quitequihuíaj “tl”, yajuanti quitequihuíaj san “t” huajca ni tlamantli náhuatl quitocaxtijque “Nahuatl Central”. Pero ni toicnihua Beller moilhuijque para nopa tlacame tlen camatij “Nahuatl Central” huelisquíaj quitequihuise Itlajtol Toteco ipan “Náhuatl Occidental” tlen Tamazunchale. Huajca quema yajuanti huan inintlapalehuijcahua pejque quinahuapatlaj Itlajtol Toteco, san quichijque ipan náhuatl Oriental huan Occidental. Queja nopa ipan xihuitl l984, quisqui tlen imprenta 5,000 Nuevos Testamentos ipan Náhuatl Oriental huan oncac se hueyi ilhuitl ipan se rancho itoca Itzocatl nepa ipan Municipio Atlapexco Hidalgo huan ipan seyoc chicome ranchos para quinextijque para ya onca Nuevos Testamentos ica náhuatl. Ome xihuitl teipa quisqui seyoc 5,000 Nuevos Testamentos tlen nopa Náhuatl Occidental tlen Tamazunchale huan sequinoc Municipios tlen San Luis Potosi. Pero ax oncayaya tleno para nopa tlacame tlen camatij nopa Nahuatl Central.

Nopa tlacame tlen camatij náhuatl Oriental huan Occidental quiselijque nopa Nuevo Testamentos ica paquilistli huan nelía quitlascamatque Tohueyiteco pampa quipixtoyaj Itlajtol Toteco ipan ininnahuatlajtoli. Quema ya quipixtoyaj inin Nuevos Testamentos ininmaco, quinilhuijque nopa toicnihua Beller para quinequiyayaj nochi nopa Biblia ica náhuatl. Huajca ipan l987 toicnihua Beller huan inintlapalehuijcahua pejque tequitij chicahuac para quinahuapatlase nopa Antiguo Testamento tlen toBiblia, tlen Genesis hasta Malaquías. Huan tequipanojque para diez y ocho xihuitl ipan ya nopa. Pero noja nopa toicnihua tlen camatij Nahuatl Central quinilhuijyayaj para ohui quipohuase nopa “tl” huan quijnequiyayaj se Biblia yajmajtic tlen san quipiya “t” para yajuanti. Huajca toicnihua Beller momacaque cuenta para monequiyaya eyi Biblias para nochi tlacame tlen camatij náhuatl ipan ni Huasteca, huan ma quipiyaca se Biblia tlen quimachilisquíaj cuali queja yajuantij camatij.

Tijmatij para ipan nochi tlaltepactli onca 6,000 tlajtoli, pero san 500 tlajtoli tlen nopa 6,000 quipiyaj se Biblia yamajtic ica inintlajtol pampa monequi miyac xihuitl tequitl huan miyac tomi para quipatlase, huan quiquixtise ipan amatl se Biblia yamajtic. Huajca para tojuanti eli se hueyi paquilistli para timechilhuise para ajsic tonali quema eyi (3) tlen nopa 500 tlajtoli ipan tlaltepactli tlen quipiya se Biblia yamajtic eltoc nicani ipan la Huasteca.

Hasta ama ipan 2013 ya quistoc 29,000 Biblias ipan ni eyi tlamantli Nahuatl de la Huasteca. Intla hueli titlapohua ica Español, ica se ome horas huelis titlapohuas ica náhuatl. Nelía ax ohui para tijpohuas ni Itlajtol Toteco ica Nahuatl.

Huajca nohuampo, xijhuica moBiblia huan xijpohua huan xijneltoca tlen ijcuilijtoc para timoscaltis ipan Toteco huan nojquiya xiquinpohuili tlen itztoque ipan mochaj, motiopa huan campa hueli.

Nojquiya ama ajsic tonali para noquiya onca nopa Biblia ica Nahuatl ipan internet. Hueli tijpantis ipan ni página www.huastecanahuatl.com Nicani huelis tijpantis miyac versículos ipan moBiblia tlen eltoc tlapejpenili para ma elis se tlapalehuili para nochi tlacame ipan inintlaneltoquilis ipan Toteco Itlajtol.

Ni tequitl quisencajqui Tami Beller Gaddis ihuaya iichpocahua, yajaya ininichpoca toicinihua Ricardo huan Patricia Beller. Yajuanti quipiyaj hueyi ininyolo ica tlacame tlen camatij náhuatl huan quinequij para ta no xiquixmati Toteco queja motemaquixtijca.

Toicnihua Ricardo huan Patricia Beller ama itztoquejya ihuaya Toteco.

Huajca, xijpohua moBiblia ihuaya nochi tlamachtili tlen mitzpalehuis tlen eltoc para ta nicani ipan internet.

Tlascamati, huan Toteco ma mitztiochihua.

XIMOCUEPA

TOCHAJ